Gördüyümüz kimi, cəmiyyətimizin çalıb-oxuyan əhli Cəhənnəm haqqında çox da xəbərdar deyil. Bəziləri özlərinə təsəlli vermək üçün cəza haqqında şəxsi konsepsiya yaradıb, digərləri günahlarını dərk edir, onları etməmək əvəzinə hansısa əsassız ümidlərlə yaşayır, başqaları isə Cəhənnəm Dəhşətini zarafat hesab edirlər. İnsan həyatı əbədidir. O, dünyasını dəyişdikdən sonra, Qiyamət günü əməllərinə görə cavab verəcək: yaxşı əməl sahibidirsə, əbədi Cənnətə, haram və qanunsuz cinayət sahibidirsə, Cəhənnəm oduna və minlərlə dözülməz əzaba atılır. Axı bu Cəhənnəm əzabları deyilən şey nədir və ondan necə xilas olmaq olar? Ən əsası unutmayaq ki, "o dünya"nın olub- olmamasından şübhələnənlər sonda öz şübhələrinin qurbanı ola bilərlər. Quranda Cəhənnəmi təsvir edən bir çox ayələr var. "...Cəhənnəmdə zəqqum ağacından yeyəcəksiniz..." ("Vaqiə" surəsi, 52-ci ayə). Zəqqum ağacının barlarının içində irinləmiş maddə yerləşir. Həmin meyvələr yeyiləndən sonra günahkarların mədəsində yandırıcı ağır maddəyə çevrilir və insanı içəridən gəbərdir. "Cəhənnəm əhlinin zəridən (quru tikan) başqa yeməyi yoxdur. Bu yemək nə kökəldir, nə də aclığı aradan aparır... Həmin gün insanın orada heç bir dostu olmayacaq. Onun yeməyi Cəhənnəm əhlinin çirkindən başqa bir şey deyil" ("Ğaşiyə" surəsi, 6-7-ci ayələr; "Haqqə" surəsi, 35-36-cı ayələr). Cəhənnəmdə insan elə əzablar görəcək ki, bu dünyada o cür əzabı təsəvvür etmək mümkün deyil. "Od onların üzlərini yandıracaq. Onlar orada qıc olmuş vəziyyətdə qalacaqlar" ("Muminun" surəsi, 104-cü ayə). Günahkarlar alov içində yanaraq daim ağrı və yanğını san ki yenidən hiss edəcək.Məhəmməd Peyğəmbər (s.ə.s) Cəhənnəm barədə söyləmişdir: "Əzabı ən az olan Cəhənnəm əhlinin ayaqlarında alovdan ayaqqabı olar və onun hərarətindən beyinləri qaynayar".Bəs kimlər Cəhənnəmə düşəcək? Bunu Allahın Özü daha yaxşı bilər. Lakin Quran ayələrindən məlum olur ki, Allaha şərik qoşanlar, kafirlər, əxlaqsız, mənəviyyatsız həyat tərzi sürənlər, pislik edənlər, şər-böhtançı olanlar, haram (donuz əti, qan, leş əti) yeyənlər, zina edənlər, həmcinsi ilə cinsi əlaqədə olanlar Cəhənnəmə düşəcək. Bu barədə Quranda belə bir ayə var: "Rəbbiniz dedi: "Mənə dua edin, Mən də sizə cavab verim. Həqiqətən, Mənə ibadət etməyə təkəbbür göstərənlər Cəhənnəmə zəlil olaraq girəcəklər" ("Mumin" surəsi, 60-cı ayə). Bəs ondan qorunmağın yolu varmı? Var! Cəhənnəmdən xilas olmağın yolunu bu dünyada axtarmaq lazımdır. Ən əsası Allaha inanmaq, yuxarıda sadalanan günahlardan etməmək, halal ruzi əldə etmək, namaz qılmaq, oruc tutmaq, ehtiyaclılara əl tutmaq və digər savab işlərlə məşğul olmaqla bu qurtuluşa nail olmaq olar.Sonda İmam Əlinin (ə) müdrik kəlamını xatırlamaq istərdik: "İnsanın qiyməti yalnız Cənnətdir, özünüzü ondan ucuzuna satmayın!".